दीपेन्द्र प्रजापति/कालो झोला ।
वीरगंज, ०६ भाद्र । वीरगंज महानगरपालिकाले शैक्षिक सत्र २०८२/०८३ का लागि छात्रवृत्ति प्रवेश परीक्षा शुक्रबार सम्पन्न गरेको छ । संस्थागत विद्यालयहरूमा छात्रवृत्ति कोटामा अध्ययन गर्न इच्छुक विद्यार्थीहरूलाई अवसर दिलाउनका लागि महानगरले चारवटा परीक्षा केन्द्रमार्फत परीक्षा सञ्चालन गरेको हो ।
यस वर्ष कक्षा ९ र ११ मा अध्ययन गर्न २ हजार ३ सय १ जना विद्यार्थीले अनलाइन फाराम भरेका थिए । तर, करिब २ सय ६८ जना विद्यार्थी परीक्षा दिन अनुपस्थित भएका छन् । बिहान साढे सात बजे देखि सुरु भई डेढ घण्टा चलेको परीक्षा शान्तिपूर्ण रूपमा सम्पन्न भएको महानगरको शिक्षा महाशाखा प्रमुख आनन्द लामिछानेले जानकारी दिनुभयो ।
महानगरले प्रत्येक वर्ष कक्षा ९ र ११ का लागि छात्रवृत्ति प्रदान गर्दै आएको छ । यस अन्तर्गत छात्रवृत्ति प्राप्त गर्ने विद्यार्थीले क्रमशः कक्षा १० र १२ सम्म सोही सुविधा निरन्तर पाउने व्यवस्था गरिएको छ । यस वर्ष महानगरभित्र सञ्चालनमा रहेका कक्षा ९ का लागि ८० र कक्षा ११ का लागि ३८ संस्थागत विद्यालयमा छात्रवृत्तिको व्यवस्था मिलाइएको छ । विद्यालयको विद्यार्थी संख्याको १० प्रतिशत बराबर छात्रवृत्ति सिफारिस गर्नुपर्ने नियम रहेको छ, जसअनुसार परीक्षामा सफल हुने विद्यार्थीलाई क्लस्टरअनुसार सिफारिस गरिनेछ ।
यसै गरी छात्रवृत्तिको सिफारिस गर्दा सामुदायिक विद्यालयमा अध्ययन गरेका र वीरगंज महानगरपालिकाका स्थायी बासिन्दा रहेका विद्यार्थीलाई प्राथमिकता दिइएको छ । यसका अतिरिक्त महिला, दलित, आदिवासी–जनजाति, अपाङ्गता भएका व्यक्ति, शहीद तथा बेपत्ता परिवारका बालबालिका र मधेश आन्दोलनका घाइतेका बालबालिकाका लागि छुट्टै आरक्षण कोटा राखिएको छ ।
शुक्रबार सम्पन्न परीक्षा चारवटा परीक्षा केन्द्रमा एकैपटक सञ्चालन गरिएको थियो । विद्यार्थीहरूको सहजता र व्यवस्थापनलाई ध्यानमा राखेर परीक्षा केन्द्रहरू तोकिएको शिक्षा महाशाखाले जनाएको छ । प्रश्नपत्र तयार गर्नेदेखि उत्तरपुस्तिका व्यवस्थापनसम्म सबै प्रक्रिया पारदर्शी ढंगले गरिएको महानगरको दाबी छ ।
महानगरले केही दिनमै परीक्षाको नतिजा सार्वजनिक गर्ने तयारी गरेको छ । नतिजा प्रकाशन भएपछि छात्रवृत्ति पाएका विद्यार्थीलाई सम्बन्धित विद्यालयमा पठाउन आवश्यक प्रशासनिक प्रक्रिया सुरु गरिनेछ । यसले आर्थिक तथा सामाजिक रूपमा कमजोर परिवारका विद्यार्थीलाई संस्थागत विद्यालयमा अध्ययन गर्ने अवसर दिलाउँदै आएको छ ।
शिक्षा क्षेत्रमा समान अवसर सुनिश्चित गर्न र असमानता घटाउन महानगर आफैंले छात्रवृत्तिको परीक्षा लिएर संस्थागत विद्यालयमा अध्ययनका लागि सिफारिस गर्ने गरेको छ ।
