दीपेन्द्र प्रजापति/कालो झोला ।
बीरगंज, ११ असार । देशभरका स्थानीय तहहरूमा असार १० गते नगरसभा तथा गाउँसभा सञ्चालन भइरहेका बेला बीरगंज महानगरपालिकाले आफ्नो २० औँ अधिवेशन सम्पन्न गर्दै आगामी आर्थिक वर्ष २०८३/०८४ का लागि नीति, कार्यक्रम तथा बजेट प्रस्तुत गरेको छ ।
कार्यवाहक महानगर प्रमुख ईम्तियाज आलमको अध्यक्षतामा सम्पन्न अधिवेशनमा कार्यपालिका सदस्य जगत प्रसाद साह कानुले आगामी आर्थिक वर्ष २०८३/०८४ का लागि कुल ४ अर्ब ४२ करोड ३४ लाख ६९ हजार रुपैयाँको अनुमानित बजेट घोषणा गरेका छन् । जसमा शिक्षा, स्वास्थ्य, कृषि, खानेपानी, सडक, सरसफाइ, सडक बत्ती तथा पूर्वाधार विकासलाई प्राथमिकतामा राख्दै नीति तथा कार्यक्रम सार्वजनिक गर्नु भएको थियो ।
कार्यवाहक महानगर प्रमुख आलमले महानगरको समग्र विकास, सुशासन र जनमुखी सेवा प्रवाहलाई प्रभावकारी बनाउने उद्देश्यका साथ बजेट ल्याइएको बताउँदै विकास निर्माणका कार्यलाई थप तीव्रता दिइने प्रतिबद्धता व्यक्त गर्नु भयो ।
मधेश प्रदेशको एक मात्र महानगरको कार्यक्रमको प्रारम्भमा महानगरपालिकाका आय लेखापरीक्षक हरि शंकर राउत कुर्मीले स्वागत मन्तव्य राख्नु भएको थियो ।
नगरसभामा प्रस्तुत नीति, कार्यक्रम तथा बजेट माथि विस्तृत छलफल पछि सर्वसम्मत रूपमा पारित गरिएको छ ।
बीरगंज स्थित रहेको नगर सभागृहमा आयोजित नगरसभामा प्रमुख प्रशासकीय अधिकृत बसन्त बहादुर बोहरा वडा नं. १ देखि ३२ सम्मका वडा अध्यक्षहरू, कार्यपालिका सदस्यहरू, नगरसभा सदस्यहरू, सञ्चारकर्मी, बुद्धिजीवी, समाजसेवी तथा स्थानीय जनसमुदायको उल्लेखनीय उपस्थिति रहेको थियो ।
सहभागीहरूले महानगरपालिकाले प्रस्तुत गरेको बजेट तथा कार्यक्रमले महानगरको विकास, आर्थिक समृद्धि र नागरिकको जीवनस्तर सुधारमा महत्वपूर्ण योगदान पुर्याउने विश्वास व्यक्त गरेका छन् ।
साथै महानगरको दिगो विकास, पारदर्शिता र उत्तरदायित्वलाई थप सुदृढ बनाउने साझा प्रतिबद्धता पनि व्यक्त गरिएको थियो ।
बीरगंज महानगरपालिकाको २० औँ अधिवेशन सौहार्दपूर्ण र भव्य वातावरणमा सम्पन्न भएको छ । प्रस्तुत ४ अर्ब ४२ करोड ३४ लाख ६९ हजार रुपैयाँको अनुमानित बजेट महानगरको विकास र समृद्धिको आधार बन्ने अपेक्षा गरिएको छ ।
