काठमाडौं । विज्ञान, प्रविधि तथा नवप्रवर्तनमन्त्री महावीर पुनले फरेन्सिकजस्तो संवेदनशील क्षेत्रमा कार्यरत विशेषज्ञका लागि न्यूनतम शैक्षिक योग्यता स्नातकोत्तर तह (मास्टर्स) हुनुपर्ने बताएका छन् ।
बुधबार बसेको शिक्षा, स्वास्थ्य तथा सूचना प्रविधि समितिको बैठकमा फरेन्सिक विधेयकमाथिको छलफलका क्रममा मन्त्री पुनले आवश्यक जनशक्ति अभाव भए अस्थायी व्यवस्थापन गरेर भए पनि योग्य जनशक्ति उत्पादन गर्नुपर्ने बताउदै फरेन्सिकजस्तो संवेदनशील क्षेत्रमा कार्यरत विशेषज्ञका लागि न्यूनतम शैक्षिक योग्यता स्नातकोत्तर तह (मास्टर्स) हुनुपर्ने बताएका हुन् ।
उनले विगतको शैक्षिक अवस्थाको आधारमा नभई वर्तमान आवश्यकता र प्रविधिको विकासलाई ध्यानमा राखेर विधेयकमा योग्यता निर्धारण गर्नुपर्ने बताए ।
मन्त्री पुनले फरेन्सिकसम्बन्धी तालिमका हकमा पनि सामान्य तालिमलाई मात्र आधार नबनाई मान्यता प्राप्त विश्वविद्यालय वा प्रमाणित संस्थाबाट प्राप्त तालिमलाई मात्रै मान्यता दिने व्यवस्था गर्नुपर्नेमा जोड दिए ।
त्यसैगरी, उनले विधेयकमा रासायनिक, भौतिक तथा जैविक प्रमाणसँगै विद्युतीय (डिजिटल) प्रमाणलाई पनि स्पष्ट रूपमा समेट्नुपर्ने बताउदै अपराध अनुसन्धानमा डिजिटल प्रमाणको महत्व निरन्तर बढ्दै र त्यसको कानुनी व्यवस्था पनि स्पष्ट हुनुपर्नेमा जोड दिएका थिए ।
