काठमाडौँ । नेपाल हस्तकला महासंघले ‘नेपाल हस्तकला प्रदर्शनी तथा सांस्कृतिक कार्यक्रम २०२६’ आयोजना गर्ने भएको छ । महासंघले आगामी जेठ ८ देखि १० गतेसम्म बालुवाटारस्थित अम्रपाली बैंक्वेट एण्ड इभेन्टमा मेला आयोजना गर्न लागिएको जानकारी दिएको हो ।
महासंघका अनुसार तीन दिनसम्म चल्ने मेलामा बिहान ११ बजेदेखि साँझ ७ बजेसम्म विभिन्न जिल्लामा उत्पादन भएका हस्तकला सामग्रीको प्रदर्शनी तथा बिक्री गरिनेछ । मेलामा करिब ७० वटा स्टल रहनेछन् ।
मेलाको मुख्य उद्देश्य स्थानीय हस्तकला उद्यमीलाई बजारसँग जोड्ने, रोजगारी तथा आयआर्जन बढाउने, परम्परागत सीप, कला, संस्कृति र स्थानीय परिकारको संरक्षण तथा प्रवर्द्धन गर्ने रहेको महासंघले जनाएको छ ।
मेलामा हस्तकला प्रदर्शनी, सांस्कृतिक कार्यक्रम, कलाकार तथा कालिगढको सीप प्रदर्शन र स्थानीय परिकारको स्वाद प्रस्तुत गरिनेछ । काठमाडौं उपत्यकासहित संखुवासभा, मकवानपुर, दाङ, बाजुरा, ताप्लेजुङ, चितवन, बर्दिया, काभ्रेपलाञ्चोक, कास्की, झापा, धनुषा, सुनसरी, धादिङ, तनहुँ, पाल्पा र बागलुङलगायत जिल्लाका संघसंस्थाको सहभागिता रहने जनाइएको छ ।
महासंघले हस्तकला क्षेत्रले ठूलो संख्यामा स्वरोजगार सिर्जना गरिरहेको उल्लेख गर्दै कृषि क्षेत्रपछि देशभर विस्तार गर्न सकिने सम्भावनायुक्त उद्योगका रूपमा हस्तकलालाई अघि बढाउनुपर्ने जनाएको छ । मेलामा प्रवेश निःशुल्क रहने आयोजकले जनाएको छ ।
