हेटौंडा । हातेमालो बचत तथा ऋण सहकारी संस्थाको आयोजनामा ७ दिने कृष्टल, गहना तथा हेयर एसेसरी निर्माण सम्बन्धी सीपमूलक तालिम सुरु भएको छ।
हेटौंडा–२, संगमचोकस्थित सहकारीको आफ्नै भवनमा सुरु भएको तालिममा सहकारीका १९ जना सदस्यहरूको सहभागिता रहेको आयोजकले जनाएको छ। तालिम यही जेठ ३ गतेदेखि सुरु भई लगातार ७ दिनसम्म सञ्चालन हुनेछ।
तालिमको उद्घाटन सहकारीका अध्यक्ष हरि पौडेलले गर्नु भयो भने कार्यक्रममा सहकारीकी व्यवस्थापक रमला सापकोटा तथा वरिष्ठ प्रशिक्षक कमला सुवेदीले मन्तव्य व्यक्त गर्नु भयो । कार्यक्रममा बोल्दै अध्यक्ष पौडेलले महिलाहरूलाई आत्मनिर्भर र उद्यमशील बनाउन यस्ता सीपमूलक तालिम आवश्यक रहेको बताउनु भयो।
तालिममा वरिष्ठ प्रशिक्षक सुवेदीले सहभागीहरूलाई कृष्टल सामग्री, विभिन्न प्रकारका गहना तथा हेयर एसेसरी बनाउने व्यावहारिक सीप प्रदान गर्र्नु हुनेछ । तालिमपछि सहभागीहरूले घरेलु उद्यममार्फत स्वरोजगार बन्दै आयआर्जन गर्न सक्ने विश्वास आयोजकको छ।
