इरान र अमेरिकाबीच जारी युद्ध रोक्न सहमति प्रयास भएको छ । रिपोर्टका अनुसार पाकिस्तानले दुवै देशसमक्ष युद्धविरामको प्रस्ताव राखेको छ ।
प्रस्तावलाई अस्थायी रूपमा ‘इस्लामाबाद सम्झौता’ नाम दिइएको बताइएको छ । यसलाई दुई चरणमा अघि बढाउने योजना रहेको छ, जसअनुसार पहिलो चरणमा तत्काल युद्धविराम लागू गरिनेछ भने दोस्रो चरणमा १५ देखि २० दिनभित्र अन्तिम सम्झौता टुंग्याइनेछ ।
पाकिस्तानका सेना प्रमुख असिम मुनीरले अमेरिकी र इरानी नेतासँग रातभर छलफल गरेको जनाइएको छ । प्रस्तावमा होर्मुज जलडमरू पुनः खोल्ने विषय पनि समेटिएको छ, जसले विश्वव्यापी तेल आपूर्ति सहज बनाउन सहयोग गर्ने अपेक्षा गरिएको छ ।
यसअघि पनि ४५ दिनको अस्थायी युद्धविरामको सम्भावना रहेको खबर सार्वजनिक भएको थियो । उक्त अवधिमा स्थायी शान्ति सम्झौताका लागि वार्ता हुने बताइएको छ। यस प्रक्रियामा पाकिस्तानसँगै मिस्र र टर्कीले मध्यस्थताको भूमिका निर्वाह गरिरहेका छन् ।
विश्लेषकहरूका अनुसार आगामी ४८ घण्टा यो सम्झौताका लागि निर्णायक हुने देखिएको छ ।
यस अघि भएका युद्ध विरामका प्रस्तावलाई भने इरानले अस्वीकार गर्दै आएको थियो । इरानले दिर्घकालिन युद्ध रोक्ने विषयमा मात्र आफु इच्छुक भएको बताउदै आएको छ । इरानले पटक पटक युद्धविरामको प्रस्ताव अस्वीकार गरेपछि ट्रम्पले मंगलबारसम्म होर्मुज नखोले इरानका उर्जा केन्द्रहरुमा आक्रमण गर्ने अन्तिम चेतावनी दिएका छन् ।
