दीपेन्द्र प्रजापति/कालो झोला ।
बीरगंज, ०८ फागुन । प्रहरी चौकी, ईनर्वा ले बुधबार छुट्टाछुट्टै समयमा प्रतिवन्धित लागु औषध गाँजा र चरेस सहित एक जना भारतिय मानिसलाई तथा चरेस सहित एक जना नेपाली महिलालाई आफ्नो नियन्त्रणमा लिएको छ ।
यसै क्रममा उक्त दिन दिउँसो करिब ०२:१५ बजेको समयमा त्यहाँ बाट बीरगंज महानगरपालिका वडा नं. १६, शंकराचार्य गेटमा खटिएको नियमित चेकिङ टोलीले नेपाल बाट भारत तर्फ जाने तथा भारत बाट नेपाल तर्फ आउने सवारी साधन तथा पैदलयात्रीहरूलाई चेक जाँच गर्ने क्रममा भारतको वंगाल राज्य, जिल्ला नदिया, थाना बधकुल्ला बजार कोलनी बस्ने वर्ष २८ को राज अधिकारीले बोकेको क्यामो ब्यागभित्र सानो सानो पोकामा लुकाइ छिपाई राखिएको लागु औषध गाँजा जस्तो देखिने पदार्थ विना प्लाष्टिकको ६ के. जी. ३ सय ग्राम र प्लाष्टिकले बेरी राखिएको लागु औषध चरेश जस्तो देखिने पदार्थ बिना प्लाष्टिकको २ के. जी.१ सय ग्राम फेला परेको हुँदा बरामद लागु औषध गाँजा जस्तो देखिने पदार्थ र चरेश जस्तो देखिने पदार्थ सहित निज राज अधिकारीलाई नियन्त्रणमा लिइ जिल्ला प्रहरी कार्यालय, पर्सा मा ल्याइ निज विरुद्द लागु औषध सम्बन्धी कसूरमा थप अनुसन्धान कार्य भइरहेको कुरा आज सूचना अधिकारी प्रहरी नायब उपरीक्षक सुवास भट्ट ले बताएका छन् ।
यसै गरि सोही दिन राति करिब ०८:०० बजेको समयमा उल्लेखित स्थान बाटै बारा जिल्लाको प्रसौनी गाउँपालिका वडा नं. ०२, बुनियाद घर भई हाल वीरगञ्ज महानगरपालिका वडा नं. १६, बसपार्कमा घरकोठा भाडामा लिइ बस्ने वर्ष ३० की आरती यादवले बोकेको ब्यागमा रातो रंगको ग्यालेन भित्र प्लाष्टिकमा सानो सानो पोकामा लुकाइ छिपाई राखिएको लागु औषध चरेश जस्तो देखिने पदार्थ ग्यालेन विनाको ११ के. जी. ४ सय ग्राम फेला परेको हुँदा बरामद लागु औषध चरेश जस्तो देखिने पदार्थ सहित निज आरती यादवलाई नियन्त्रणमा लिइ जिल्ला प्रहरी कार्यालय, पर्सा मा ल्याइ निज विरुद्द लागु औषध सम्बन्धी कसुरमा थप अनुसन्धान कार्य भइरहेको कुरा पनि आजै सूचना अधिकारी भट्ट ले बताएका छन् ।
