दीपेन्द्र प्रजापति/कालो झोला ।
बीरगंज, ०६ जेष्ठ । जिल्ला प्रहरी कार्यालय, पर्सा तथा मातहतका वडा प्रहरी कार्यालय, बिर्ता द्वारा खटिएको संयुक्त प्रहरी टोलीले सोमबार राति करिब ०८:०० बजेको समयमा वीरगञ्ज स्थित रहेको सिद्धार्थ दियालो होटल बाट दुर्गा प्रसाद प्रसाईं लाई आफ्नो नियन्त्रणमा लिएको छ ।
उनी विभिन्न सञ्चार माध्यम तथा ( Social Media ) सामाजिक सञ्जाल मार्फत विभिन्न किसिमको अभिव्यक्तिहरू दिने क्रममा सार्वजनिक नैतिकता, शिष्टचार विरुद्ध कसै प्रति घृणा वा द्वेष फैलाउने र विभिन्न जातजाती र सम्प्रदाय बीचको सुमधुर सम्बन्धलाई खलल् पार्ने र नेपाल सरकार वा नेपाल सरकारको काम कारवाहीको सम्बन्धमा कुनै किसिम बाट निराधार वा अप्रमाणित कुरा देखाइ नेपाल सरकार प्रति घृणा, द्वेष वा अवहेलना गर्ने गरी विभिन्न किसिमको अमर्यादित तथा अस्वस्थ्य आलोचनात्मक अभिव्यक्तिहरू दिएकोले पक्राउ गरिएको हो ।
झापा जिल्लाको विर्तामोड नगरपालिका वडा नं. ०५ घर भई हाल भक्तपुर जिल्लाको मध्यपुर ठिमी नगरपालिका वडा नं. ०६ बस्ने वर्ष ५६ को दुर्गा प्रसाद प्रसाईलाई नियन्त्रणमा लिइ निज उपर विधुतीय ( इलेक्ट्रोनिक ) कारोबार ऐन र राज्य विरुद्धको कसूरमा पर्सा जिल्ला अदालत बाट तीन दिनको म्याद थप अनुमति लिइ आवश्यक अनुसन्धान कार्य भैरहेको कुरा सूचना अधिकारी प्रहरी नायब उपरीक्षक हरि बहादुर बस्नेत ले बताएका छन् ।
