काठमाडौँ । प्रतिनिधिसभाको राज्य व्यवस्था समितीको सभापतिको चयन गर्न कांग्रेस छलफलमा रहको छ ।
सभामुखले समितिको सभापतिको टुंगो लगाउन कांग्रेसलाई दबाब दिएपछि आजै टुंगो लगाउने गरि कांग्रेस छलफलम जुटेको हो । कांग्रेसले पदाधिकारी बैठक बसेर समितिको सभापतिको नाम तय गर्न तयारी गरेको छ ।
यसैबीच सभामुखको सचिवालयका अनुसार समितिको सभापतिको निर्वाचनको सूचना आइतबार प्रकाशन गर्न सभामुखले चाहेको भएपनि कांग्रेसको अनुरोधमा रोकिएको थियो ।
अन्य दलको दाबी नरहेको अवस्थामा सभामुखले कांग्रेस प्रमुख सचेतकसँग आइतबार सभामुखले दुई पटक छलफल गरेपनि आन्तरिक छलफल गर्नुपर्ने भएकाले सूचना रोकिदिन कांग्रेसले आग्रह गरेपछि सभामुख पछि हटेका थिए । कांग्रेस प्रमुख सचेतकले आज बिहान पदाधिकारी बैठकले सभापतिको टुंगो लगाउने जानकारी दिएको बताइएको छ ।
प्रतिनिधि सभा नियमावलीको १७७ को ५ अनुसार समितिको सभापति रिक्त भएको मितिले १५ दिन भित्र निर्वाचन गरिसक्नुपर्ने व्यवस्था रहेको छ । त्यस्तै सभामुखले सभापति निर्वाचनको सुचना निर्वाचन हुने दिन भन्दा ४८ घण्टा अगाडी प्रकाशन गर्नुपर्ने व्यवस्था रहेको छ । सो व्यवस्था अनुसार आज बिहान सभामुखले समितिको सभापतिको निर्वाचनको सूचना जारी गर्नैपर्ने नियमावलीको बाध्यात्मक परिस्थिति रहेको छ ।
समितिका तत्कालिन सभाति रामहरी खतिवडाले साउन २७ गते राजीनामा दिएका थिए ।
