नसर्ने रोगको बढ्दो चुनौतीबीच पोखरा महानगरपालिकामा सहरी स्वास्थ्य प्रणाली सुदृढीकरण परियोजना अन्तर्गत एक अध्ययन सम्पन्न भएको छ । सन् २०२२ देखि २०२५ सम्म सञ्चालन भएको उक्त अध्ययन महानगरपालिकासँगको सहकार्यमा हर्ड इन्टरनेसनलले गरेको हो ।
अध्ययनमा अधिकांश बिरामी उपचारका लागि पहिलोपटक निजी औषधि पसल वा निजी स्वास्थ्य केन्द्रमा पुग्ने गरेको पाइएको छ। त्यसैले सार्वजनिक र निजी क्षेत्रबीच सहकार्य गर्दै नसर्ने रोगको उपचार तथा व्यवस्थापनलाई थप प्रभावकारी बनाउन आवश्यक रहेको अध्ययनमा उल्लेख गरिएको छ ।
अध्ययनले विशेषगरी उच्च रक्तचापको परीक्षण र प्रारम्भिक पहिचानमा निजी औषधि पसलको सहभागिता प्रभावकारी देखिएको जनाएको छ। निजी औषधि पसललाई प्रारम्भिक परीक्षण र परामर्श प्रक्रियामा समावेश गर्दा समुदायमा स्वास्थ्य सेवाको पहुँच बढ्ने, जोखिममा रहेका व्यक्तिको छिटो पहिचान हुने र आवश्यक परे सार्वजनिक स्वास्थ्य संस्थामा पठाउने प्रक्रिया पनि प्रभावकारी हुने देखिएको अध्ययनले जनाएको छ।
पोखरा महानगरपालिकाका प्रमुख धनराज आचार्यले स्वास्थ्य सेवा मानिसको जीवनस्तरसँग प्रत्यक्ष सम्बन्धित भएकाले यसको दिगोपना र नियमिततामा ध्यान दिनुपर्ने बताए। स्वास्थ्य सेवामा हुने सानो त्रुटिले पनि मानिसको स्वास्थ्य जोखिममा पर्न सक्ने भएकाले सबै पक्ष सचेत भएर काम गर्नुपर्ने उनले उल्लेख गरे ।
उनले नागरिकको स्वास्थ्य सुरक्षाका लागि महानगरपालिका प्रतिबद्ध रहेको र स्वास्थ्य सेवा सबैको पहुँचमा पुर्याउन प्रयास भइरहेको बताए। नसर्ने रोगको व्यवस्थापनसम्बन्धी अध्ययनले औँल्याएका विषयलाई महानगरपालिकाको नीति तथा कार्यक्रममा प्राथमिकतासाथ समावेश गरिने पनि उनले जानकारी दिए ।
कार्यक्रममा गण्डकी प्रदेशका अतिरिक्त सचिव, पोखरा महानगरपालिकाका प्रमुख प्रशासकीय अधिकृत मुक्तिराम अर्याल, स्वास्थ्य महाशाखा प्रमुख भरतराज पौडेल, औषधि व्यवसायी, औषधि पसल सञ्चालक तथा हर्ड इन्टरनेसनलका प्रतिनिधिहरूको सहभागिता रहेको थियो।
