काठमाडौँ । आजदेखि नेपाली सिनेमाको बक्स अफिसमा तीन फिल्म मैदानमा उत्रिएका छन् ।
आजदेखि मिथिला शर्माको प्रमुख भूमिका रहेको ‘गुरु आमा’, स्वस्तिमा खड्काको प्रमुख भूमिका रहेको ‘लालीबजार’ र रामकृष्ण ढकालले निर्माण गरेको ‘मालती मंगले’प्रदर्शनमा आएको छ ।
यस अघि बैशाख १८ गते रिलिज हुने भनिएको लालीबजार कानुनी झमेलामा परेपछि आज रिलिज भएको हो । यस फिल्मले देशभर १२० भन्दा बढी शो पाएको छ । त्यस्तै विजय बराल र बर्षा राउत अभिनित ‘मालती मंगले’ ले देशभर करिब १०५ शो पाएको छ । त्यस्तै अर्को फिल्म ‘गुरु आमा’ ले भने करिब ७१ शो पाएको छ ।
यम थापाको निर्देशनमा बनेको ‘लालीबजार’ मा स्वस्तिमा खड्का, रवीन्द्रसिंह बानियाँ, समाइरा थापा, विशाल देवकोटा, प्रशंसा सुवेदी, मुकुन्दकुमार श्रेष्ठ, अभय बरालसहितको अभिनय रहेको छ ।
त्यसैगरी गायक रामकृष्ण ढकालले पहिलो पटक निर्माण गरेको र प्रकु पाण्डेयको निर्देशन रहेको ‘मालती मंगले’ मा विजय बराल, वर्षा राउत, मेक्सम गौडेल, प्रकाश घिमिरे, सरिता गिरी लगायतका कलाकारहरूको अभिनय रहेको छ ।
त्यस्तै, प्रेम सोनी सुनारको निर्देशनमा बनेको फिल्म ‘गुरु आमा’ मा मिथिला शर्मा, गौरी मल्ल, बुद्धि तामाङ, सुशील पोखरेललगायतका कलाकारहरूको अभिनय रहेको छ ।
