काठमाडौँ । बलिवुड फिल्म सैयाराको ऐतिहासिक सफलतापछि यश राज फिल्म्सले निर्देशक मोहित सुरीसँगको सहकार्यलाई अझ दीर्घकालीन बनाउने तयारी गरेको छ ।
मोहित सुरीको आगामी निर्देशनमा बन्ने चलचित्रमा फेरि अहान पाण्डे र अनीत पड्डाको जोडी दोहोरिने यस अघि नै घोषणा गरिएको छ । साथै, यो टोलीबीच दीर्घकालीन सहकार्यको आधारसमेत तयार भइरहेको बताइएको छ ।
बलिवुड हङ्गामाको रिपोर्टका अनुसार मोहित सुरीले यशराज फिल्म्ससँग बहु–चलचित्र सम्झौता गरेका छन् । उक्त सम्झौता कम्पनीका प्रमुख कार्यकारी अक्षय विधानीको पहलमा भएको बताइएको छ । जस अनुसार सैयारा परियोजना अक्षय विधानीले यशराज फिल्म्सका लागि तयार गरेका थिए । त्यसयता मोहित सुरी र विधानीबीच निकै घनिष्ठ सम्बन्ध बनेको छ । यशराज फिल्म्ससँग दुई निर्देशन परियोजना तय गरिसकेपछि अब मोहित सुरी निर्माता भूमिकामा पनि अघि बढ्ने तयारीमा छन् । उनले कम्पनीका लागि धेरै रोमान्टिक चलचित्र निर्माण तथा विकास गर्ने जनाइएको छ ।
हाल कम्तीमा दुई वटा रोमान्टिक चलचित्र विकासको चरणमा रहेका छन्, जसलाई मोहित सुरीले सह–निर्माण गर्नेछन् । यो कदम यशराज फिल्म्सले आफ्नो चलचित्र प्रदर्शन रणनीति र नेतृत्व संरचनामा व्यापक परिवर्तन गरिरहेका बेला आएको हो । सैयारा पछि सौगता मुखर्जी र सुमना घोषले कम्पनीका चलचित्र तथा शृंखलाको रचनात्मक विकासको जिम्मेवारी सम्हालेका छन् । यसले स्क्रिप्टमा आधारित र व्यवस्थित कथावाचनलाई थप प्राथमिकता दिइने संकेत गरेको छ ।
भावनात्मक र व्यावसायिक चलचित्र निर्माणका लागि परिचित मोहित सुरीले दर्शकको बदलिँदो रुचिअनुसारका परियोजना विकास गर्ने अपेक्षा गरिएको छ । साथै, उनले यशराज फिल्म्सको विशाल वितरण सञ्जाल र निर्माण क्षमताको लाभ पनि उठाउनेछन् ।
यस सहकार्यले मोहित सुरीलाई कम्पनीको आगामी सामग्री तथा निर्माण रणनीतिको केन्द्रमा पुर्याएको विश्लेषण गरिएको छ ।
यसैबीच मोहित सुरीको नयाँ निर्देशन आगामी सन् २०२६ को अक्टोबरबाट छायांकनमा जाने तयारीमा रहेको बताइएको छ । अभिनेता अहान पाण्डेले निर्देशक अली अब्बास जफर सँगको हालको परियोजना पूरा गरेपछि चलचित्रको काम सुरु हुनेछ ।
