विराटनगर । अविरल वर्षापछि आएको बाढी र पहिरोले पाँचथरको याङवरक गाउँपालिका–१ र २ मा ठूलो क्षति पुर्याएको छ ।
दोभाने खोला, तमोर नदी तथा मध्यपहाडी राजमार्ग आसपासमा आएको बाढीले सडक, आधा दर्जनभन्दा बढी पुल र सर्वसाधारणका घरमा क्षति पुगेको प्रहरीले जानकारी दिएको छ ।
तमोर नदीमा निर्माणाधीन लिम्बुनी मोटरेबल पुल पूर्ण रूपमा बगेको छ भने दोभाने खोलास्थित जलविद्युत् आयोजनामा पनि क्षति भएको छ । यस्तै, पहिरोले याङवरक–३ र ७ बीचको लाम्वाखोला ढाँड क्षेत्रमा दुई घर बगाएको छ । प्रभावित परिवारलाई सुरक्षित स्थानमा सारिएको र च्याङथापु–थर्पु सडकखण्ड अवरुद्ध बनेको जिल्ला प्रहरी कार्यालय पाँचथरले जानकारी दिएको छ ।
प्रहरीले निरन्तर वर्षा र सञ्चार अवरोधका कारण क्षतिको पूर्ण विवरण आउन बाँकी रहेको र अहिले राहत र उद्धारको कार्य जारी रहेको जनाएको छ ।
