दीपेन्द्र प्रजापति/कालो झोला ।
वीरगञ्ज, १८ वैशाख । वीरगञ्ज महानगरपालिका–२ मा अवस्थित ऐतिहासिक छपकैया पोखरीको संरक्षणमा उल्लेखनीय भूमिका निर्वाह गर्ने स्थानीय अभियन्ता जफरुल मिया (जफर) लगायतका अगुवाहरूलाई महानगरपालिकाले सम्मान गरेको छ ।
वर्षौंदेखि भू–माफियाको अतिक्रमणको जोखिममा परेको करिब ४ बिघा क्षेत्रफलमा फैलिएको यस महत्वपूर्ण सार्वजनिक जलाशयलाई जोगाउन जफर र उनको टोलीले निरन्तर कानुनी, सामाजिक तथा जनचेतनामूलक संघर्ष गर्दै आएका थिए ।
यस अभियानमा देखाएको साहस, प्रतिबद्धता र योगदानको कदर गर्दै वीरगञ्ज महानगरपालिकाले आज आयोजित एक कार्यक्रमबीच जफरसहित अभियानमा सक्रिय रूपमा सहभागी करिब ४० जना स्थानीयलाई सम्मान गरेको हो ।
कार्यक्रममा महानगर प्रमुख राजेशमान सिंहले उनीहरूलाई सम्मानपत्र प्रदान गर्दै सार्वजनिक सम्पत्ति संरक्षणमा उनीहरूले देखाएको अग्रसरता समाजका लागि प्रेरणादायी भएको उल्लेख गर्नु भयो ।
सम्मान कार्यक्रममा बोल्दै जफरुल मियाले महानगरपालिकाबाट प्राप्त सम्मानप्रति धन्यवाद व्यक्त गर्नु भयो । उहाँले लामो संघर्षको यात्रामा महानगरले पुर्याएको साथ, सहयोग र समर्थनप्रति विशेष आभार प्रकट गर्नुभयो। साथै, सार्वजनिक सम्पत्तिको संरक्षणमा सबै नागरिक सचेत र जिम्मेवार बन्नुपर्ने आवश्यकता पनि उहाँले औंल्याउनु भयो ।गत चैत १७ गते पर्सा जिल्ला अदालतका न्यायाधीश माधव घिमिरेको इजलासले गरेको ऐतिहासिक फैसलाले यस पोखरीलाई भू–माफियाको कब्जाबाट मुक्त गरिदिएको थियो ।
अर्बौँ मूल्य बराबरको यो जलाशयमाथि भएको अवैध दाबीलाई खारेज गर्दै अदालतले यसलाई सार्वजनिक सम्पत्तिको रूपमा कायम गरेको हो ।
यस ऐतिहासिक निर्णयका लागि जफरुल मिया सहितको टोलीले एक दशकभन्दा बढी समय संघर्ष गर्नुपरेको थियो । उनीहरूले २०३१ सालदेखिका नगर पञ्चायतका ठेक्का रसिद, बोर्ड बैठकका निर्णयहरू, तथा अन्य महत्वपूर्ण ऐतिहासिक दस्तावेजहरू संकलन गरी अदालतमा प्रमाणका रूपमा पेश गरेका थिए । यी प्रमाणहरूले पोखरीको सार्वजनिक हैसियत पुष्टि गर्न निर्णायक भूमिका खेलेका थिए ।
छपकैया पोखरीको संरक्षणका लागि गरिएको यो संघर्षले केवल एउटा जलाशय मात्र जोगाएको छैन, बरु सार्वजनिक सम्पत्तिको रक्षा गर्न नागरिकस्तरबाट पनि प्रभावकारी पहल सम्भव हुन्छ भन्ने सशक्त सन्देश दिएको छ ।
