दीपेन्द्र प्रजापति/कालो झोला ।
वीरगञ्ज, ०७ असोज । नेशनल मेडिकल कलेज तथा शिक्षण अस्पतालमा “Charitable Cultural Fest & Award Affiliation Ceremony” भव्यतापूर्वक सम्पन्न भएको छ ।कार्यक्रमको उद्देश्य चिकित्सा शिक्षा मात्र नभई समाजसेवा, सिर्जनात्मकता र नेतृत्वतालाई प्रोत्साहन गर्ने रहेको आयोजकले जानकारी दिएका छन् ।
कार्यक्रममा मुख्य अतिथिका रूपमा प्रा.डा. जैनुदिन अन्सारी – अध्यक्ष, नेशनल मेडिकल कलेज र विशिष्ट अतिथिका रूपमा शहनवाज अन्सारी – प्रबन्ध निर्देशक, नेशनल मेडिकल कलेजको विशेष उपस्थिति रहेको थियो ।कार्यक्रमको अध्यक्षता प्रा.डा. के. एन. सिंह – प्रिन्सिपल, नेशनल मेडिकल कलेजले गर्नुभएको थियो।
त्यसैगरी शैक्षिक निर्देशक – डा. रुबी श्रेष्ठ यास्मिन, अस्पताल निर्देशक – डा. इशरत जहाँ अन्सारी, एडमिसन तथा मार्केटिंग निर्देशक – आबिद हुसेन अन्सारी, नेशनल मेडिकल कलेज च्यारिटेबल सोसाइटीका अध्यक्ष डा. रबीशंकर गुप्ता (उप-प्रिन्सिपल), नर्सिङ निर्देशक, उप-प्रिन्सिपल नर्सिङ, विभिन्न संकायका प्राध्यापक, विद्यार्थी र प्रशासनिक अधिकृतहरूको उल्लेखनीय उपस्थितिले कार्यक्रममा गरिमा थपेको थियो ।
कार्यक्रममा स्वागत नृत्य, भाषण, विद्यार्थीहरूको सिर्जनात्मक प्रस्तुति, च्यारिटेबल सोसाइटी तथा नेपाल हेल्थ कोर्प्सको वार्षिक प्रतिवेदन प्रस्तुति, पुरस्कार वितरण तथा चेक हस्तान्तरण जस्ता आकर्षक गतिविधिहरू सम्पन्न भए ।
कार्यक्रमले उत्कृष्टता पहिचान, नेतृत्व विकास, सिनियर–जुनियर बीचको सम्बन्ध मजबुत बनाउने, सामाजिक उत्तरदायित्वप्रति जागरुकता बढाउने र विद्यार्थीलाई आत्मविश्वासी बनाउने अपेक्षा गरिएको आयोजक समितिको भनाइ छ ।
नेशनल मेडिकल कलेज चैरेटेबल सोसाइटीले विगतदेखि नै निःशुल्क स्वास्थ्य परीक्षण शिविर, बृक्षारोपण, रक्तदान, कपडा वितरण, जनचेतना कार्यक्रम, खेलकुद र सांस्कृतिक गतिविधि, तथा विभिन्न सामाजिक सेवामूलक कार्य गर्दै आएको छ ।
नेशनल मेडिकल कलेजले यस्ता कार्यक्रममार्फत “Beyond Medicine, Towards Humanity” को सन्देशलाई निरन्तर अघि बढाउने प्रतिबद्धता व्यक्त गरेको छ ।
