काठमाडौँ । टेस्लाका बोर्ड अध्यक्ष रोबिन डेनहोमले एलन मस्कले कम्पनि छोड्न सक्ने चेतावनी दिएका छन् ।
डेनहोमले यदि शेयरधारकहरूले नोभेम्बर ६ मा कम्पनीको वार्षिक बैठकमा एलन मस्कको प्रस्तावित एक ट्रिलियन डलर बराबरको पारिश्रमिक योजनालाई अनुमोदन नगरेमा मस्कले कम्पनीको प्रमुख कार्यकारी अधिकृत (सीईओ) पदबाट राजीनामा दिन सक्ने चेतावनी दिएका हुन् ।
रोयटर्सको रिपोर्ट अनुसार, लगानीकर्ताहरूलाई लेखेको पत्रमा, रोबिन डेनहोमले यो प्रदर्शन-आधारित योजना कम्तिमा अर्को साढे सात वर्षसम्म मस्कलाई टेस्लाको नेतृत्वमा राख्नको लागि डिजाइन गरिएको बताएका छन् ।
उनले मस्कको नेतृत्व कम्पनीको भविष्यको लागि महत्त्वपूर्ण रहेको उल्लेख गर्दै यदि उनलाई रहन प्रोत्साहित गर्ने प्याकेज प्राप्त भएन भने, टेस्लाले आफ्नो समय, प्रतिभा र दृष्टिकोण गुमाउन सक्ने उल्लेख गरेका छन् । उनले टेस्लाले कृत्रिम बुद्धिमत्ता (एआई) र स्वायत्त ड्राइभिङ प्रविधिमा विस्तार गर्ने लक्ष्य राखेकोले यसमा मस्कको योगदान महत्त्वपूर्ण रहेको पत्रमा उल्लेख गरेका छन् ।
रोयटर्सका अनुसार, प्रस्तावित योजना अन्तर्गत, यदि टेस्लाले ८.५ ट्रिलियन डलरको बजार मूल्य र स्वायत्त प्रणाली र रोबोटिक्समा प्रगति जस्ता प्रमुख कोसेढुङ्गाहरू प्राप्त गरेमा मस्कलाई स्टक विकल्पहरूको १२ अलग-अलग किस्ताहरू प्रदान गरिने उल्लेख छ । डेनहोमले यो योजनाले कम्पनीको सफलता र शेयरधारकहरूको फाइदाको आधारमा मस्कलाई पुरस्कृत गर्ने रहेको बताएका छन् । उनले लगानीकर्ताहरूलाई मस्कसँग लामो समयदेखि नजिकबाट काम गरेका तीन निर्देशकहरूलाई पुन: निर्वाचित गर्न पनि आग्रह गरेका छन् ।
केही शेयरधारकहरू र विज्ञहरूले टेस्लाको बोर्डको आलोचना गरेका छन् । बोर्ड मस्कबाट पूर्ण रूपमा स्वतन्त्र नभएको भन्दै आलोचना गरेका हुन् ।
