काठमाडौँ । श्रम संस्कृति पार्टीका अध्यक्ष हर्क साम्पाङले सरकारले संसद अधिवेशन नबोलाएपछि जवाफदेही बन्न चेतावनी दिएका छन् ।
पत्र लेख्दै साम्पाङले लिपुलेक हुँदै भारतले कैलाश–मानसरोवर जाने मार्ग सञ्चालन गरिरहँदा सरकार निष्क्रिय बनेको आरोप लगाउदै दार्चुलाको दुम्लिङसम्म सडक पुर्याउन नसकेको र महाकाली नदी किनार मिचेर बनाइएको बाटोसमेत रोक्न नसकेको आरोप लगाएका छन् ।
उनले कूटनीतिक नोट पठाएर मात्र दायित्व पूरा नहुने भन्दै चीन, भारत, नेपाल र संयुक्त राष्ट्रसंघलाई सहभागी गराएर चारपक्षीय वार्ता टोली गठन गरी समस्या समाधानतर्फ जानुपर्ने बताएका छन् । साथै सीमामा सेना खटाउनुपर्ने बताउदै उनले सेनालाई व्यक्तिगत सेवामा होइन, राष्ट्रको सीमाको सुरक्षामा केन्द्रित गर्नुपर्ने उल्लेख गरेका छन् । उनले भनेका चाहन- ‘सेनालाई सिमानामा खटाउनु ! मंत्रीको गाडीको ढोका खोल्ने काममा होइन, व्यक्तिगत पाले बनाएर राख्ने होइन सिमा रक्षकको रुपमा सेनालाई खटाउनु पर्दैन ? सुकुमबासी बस्ती भत्काउन जाँदा लाने होइन त्यता ! सिमानामा पठाउनु ! सिमानामा सेना नभएकै कारण सिमाना मिचिएकोछ !’
साम्पाङले विपद् व्यवस्थापनमा पनि सरकार कमजोर देखिएको उल्लेख गर्दै बाढीपहिरोले क्षति पुर्याएका सडक खुलाउन र राहत व्यवस्थापनमा ध्यान दिनुपर्नेमा अन्यत्र स्रोत प्रयोग भइरहेको भन्दै आलोचना गरेका छन् ।
उनले विदेशी ऋण लिएर अर्थतन्त्र कमजोर बनाइएको आरोप लगाउँदै आर्थिक सुधार गर्न नसक्नेले शासन सञ्चालन गर्न नसक्ने बताउदै राज्य सञ्चालन गर्न नसक्ने अवस्था भए पदबाट राजीनामा दिनसमेत सुझाव दिएका छन् ।
सुकुम्बासी बस्ती हटाउने कार्यप्रति आपत्ति जनाउँदै सबै पक्षलाई समेटेर समाधान खोज्नुपर्ने उनको भनाइ छ । साथै बजेट निर्माण गर्दा सबै दलका सांसदमार्फत जनताका आवश्यकता सम्बोधन गर्नुपर्नेमा जोड दिएका छन् । अध्यक्ष साम्पाङले सरकार पारदर्शी बन्नुपर्ने, पत्रकारमार्फत जनतालाई जानकारी दिनुपर्ने र उठाइएका प्रश्नहरूको जवाफ सार्वजनिक रूपमा दिनुपर्ने माग गरेका छन् ।
