दीपेन्द्र प्रजापति/कालो झोला ।
वीरगञ्ज, २२ चैत्र । नेशनल मेडिकल कलेज तथा शिक्षण अस्पताल, वीरगञ्ज द्वारा स्पोर्ट्स वीक २०८२ अन्तर्गत उद्घाटन कार्यक्रम आज भव्य रूपमा सम्पन्न भएको छ । कलेज परिसर स्थित फुटबल ग्राउण्डमा बिहान ९:३० बजेदेखि सुरु भएको उक्त कार्यक्रममा विद्यार्थी, शिक्षक तथा कर्मचारीहरूको उत्साहजनक सहभागिता रहेको थियो ।
कार्यक्रम नेशनल मेडिकल कलेजका प्रिन्सिपल प्रा. डा. के. एन. सिंहको अध्यक्षतामा सम्पन्न भएको थियो भने प्रमुख अतिथिका रूपमा कलेजका प्रबन्ध निर्देशक शहनवाज अन्सारीको उपस्थिति रहेको थियो । विशेष अतिथिका रूपमा एडमिशन तथा मार्केटिङ निर्देशक अबिद हुसैन अन्सारी, अस्पताल निर्देशक डा. इश्रत जहाँ अन्सारी, उप-प्राचार्य डा. रवि शंकर गुप्ता, डेन्टल उप-प्राचार्य प्रा. डा. सरोज देव, नर्सिङ निर्देशक प्रा. गंगा गुरुङ, नर्सिङ क्याम्पसकी उप-प्राचार्य प्रा. बबिता सिंह लगायतको उपस्थिति रहेको थियो ।
कार्यक्रममा स्पोर्ट्स चेयरपर्सन प्रा. डा. आनन्द कुमार चौरेसिया, स्पोर्ट्स सदस्य सचिव जाफ्रे आलम अन्सारी तथा स्पोर्ट्स को-अर्डिनेटर मोहम्मद फिरोजको सक्रिय भूमिका रहेको थियो । साथै मधेश प्रदेशका राष्ट्रिय क्रिकेट खेलाडी तथा कप्तान हाशिम अन्सारीको विशेष उपस्थिति कार्यक्रमलाई थप आकर्षक बनाएको थियो ।
कार्यक्रमको सुरुवात राष्ट्रिय गानबाट गरिएको थियो । त्यसपछि अध्यक्ष, विशेष अतिथि तथा प्रमुख अतिथि बाट मन्तव्य व्यक्त गरिएको थियो, जसमा खेलकुदले विद्यार्थीहरूमा अनुशासन, स्वास्थ्य तथा नेतृत्व विकासमा महत्वपूर्ण भूमिका खेल्ने उल्लेख गरिएको थियो ।
उद्घाटन अवसरमा विभिन्न संकायका विद्यार्थीहरू द्वारा आकर्षक मार्चपास्ट प्रस्तुत गरिएको थियो । साथै स्वयंसेवकहरू लाई खेल सामग्री वितरण गरिएको थियो भने कार्यक्रमलाई थप उल्लासमय बनाउन बेलुन उडाएर कार्यक्रम समेत सम्पन्न गरिएको थियो ।
कार्यक्रमको मुख्य आकर्षणका रूपमा विद्यार्थी र शिक्षकबीच मैत्रीपूर्ण उद्घाटन खेल सम्पन्न भएको थियो, जसले सम्पूर्ण वातावरणलाई ऊर्जा र उत्साहले भरिपूर्ण बनाएको थियो। कार्यक्रममा आईटी, मार्केटिङ, प्रशासन तथा सञ्चारकर्मीहरूको पनि उल्लेखनीय उपस्थिति रहेको थियो ।
स्पोर्ट्स वीक २०८२ अन्तर्गत आगामी दिनहरूमा विभिन्न खेलकुद प्रतियोगिताहरू आयोजना गरिने कलेज का प्रेस सलकार आशिक अन्सारीले जनाउनु भएको छ ।
